買居屋﹖﹗﹗

考慮緊究竟買唔買好。如果買的話，就用綠表，聽聞綠表可以只俾 5% 首。唔買的話，可能要等樓市下跌，但唔知幾時先會跌…

講番買，暫時心水係荃灣，一來唔係單棟，管理費應該無咁貴，二來近兩公婆老家，由個盤去地鐵站，懶得行時坐的士都叫負擔得起，三來話晒叫荃灣，買野、去邊都方便。但一日未親身去看看實際環境，一日都唔可以下決定。

兩房或三房都會考慮

我比較過兩房同三房的負擔，就咁睇，沒有太大問題。

	實用呎數	樓價 (1)	首期 (2)	月供 (2.5%) (3)	月供 (5.0%) (3)
兩房	約450呎	約300萬	約15萬	約1.1萬	約1.5萬
三房	約600呎	約400萬	約20萬	約1.5萬	約2.0萬

(1) 以報紙報導說，實用呎價約 $6500；
(2) 以5%首期來看；
(3) 以供30年計；

但我相信有人會問：「你可以拎到2萬來供樓，點解唔買私人樓，反而去買居屋咁 on 9？」

時間、空間，二者選其一

唔好忘記，300萬有450呎，400萬600呎，如果係私人樓，樓齡仲要係5年以下的，我相信已經無太多選擇，而家新界區都已經無咩300萬的私人新樓。有都只會好似嵐山咁—「高級劏房」。 而400萬呢﹖ 選擇則多番啲啲，卻不要奢望能有一樣大少，以現在一般萬多蚊一呎計，應該可以買到3百多4百多呎，主要會係元朗 (其實係洪水橋) 、天水圍或屯門一帶，市區的則只能買2百多3百呎。我曾經住過天水圍，兩房4百多呎，爽，但每日的車費及時間便不得了，番香港區來回要三個鐘，每程要廿多蚊。如果選擇放棄空間，如果只因為是私人樓，要我買個二百多呎的樓，唔夠說服力…因為我而家都係住緊2百呎公屋，但交通極之方便，如果係生活質數無改變之下來買樓，我過唔到自己。

每月差幾百

講番首期，傳統智慧（即老人家的說法）話首期俾得愈多愈好，因為之後利息會少一點。我認同，但卻唔會做。自己計過數，以400萬為例，9成同9成半的每月供款如下﹔

九成按揭﹔     14,729
九成半按揭﹔ 15,015

每月供款只是相差約300元，但首期卻要俾多20萬。20萬係現今社會來講唔多，但20萬用來買股票的話 (例如﹔ 03988.HK 中國銀行)，每年會有約 1.1萬股息，每月即約有 990 元，用來補回呢 300 元差價後，仲有 600 元入袋，不知幾好。

下一步，實地觀察

講多無謂，最實察係實地觀察，來緊的一段時間，我會抽時間去唔同的地盤實察一下，看看交通 (上下班)、日常鳩烏 (購物)、回老家及去市區等方不方便。