又買多條 1kg Heraeus 銀條

日期: 2014-05-02
店鋪: 金城金條
類別: Heraeus .999 1KG 銀條
價值: HKD 5,150

難得琴日放假，就走左去金城金條買左條 1kg 的賀利氏銀條。其實想再買好耐，但平時真係太忙，午飯時根本抽唔到時間去買，所以一直拖拖拖…拖到琴日放假先去買。係我拖拉的期間，銀價上落唔大，一直係 US $19 - US $21 之間橫行，係我買的事候個價仲要跌穿埋 US $19，真係好彩。對比上一次買銀 (已經係差唔多一年前)，價錢只係相差 HK$300 元。

金城轉左單據，以前係用手寫單，而家變左電腦印出來，堅左好多。

今次係同太座一齊上去買，帶佢上去一次，以後如果我想買又無時間的，就可以叫太座幫我買。太座問我啲銀保唔保值，我笑住答妳啲爛鐵 （LC）都保值，無理由銀唔保值。其實銀同金一樣都係貴金屬，只係銀平啲，而賣番出去的話就看當時個價，當然短期我唔會賣，反正我只是用閒錢（透過做 freelance 賺番來的錢）去買銀，心態跟買模型玩具一樣。

過去的一年，已經少了很多人再提買銀，之前跟開的 blogger 也都停晒手無再入貨，可能係因為感到貴金屬價格會再下跌，所以先觀望一下吧。

不論如何，我希望將來自己有堆金、銀山。

離開時多口問左靚仔一句，會唔會有 500g 的金買（其實我係想問 100g，但唔知點解講左 500g），靚仔話有，仲話除左 500g，佢地仲有 250g，100g，50g，連 1g 都有，只要打電話上來問左先就得，無貨的話要係倉到拿，約兩至三日。問佢點解唔放係網站公告天下，佢答好少人對呢啲重量有興趣，所以費事放，仲話佢地有晒賀利氏全線產品，有咩想要打個電話就得。

正！！因為我正想買 100g 的金。

什麼時候買黃金白銀最好﹖﹗﹗

經濟好買黃金 - 因為經濟好，黃金便會失去避險的作用，失去保值的作用，同時，投資黃金是沒有收益 (利息) 的，這便令到投資者對黃金失去興趣，供給大增，黃金的價值便會下跌，而這時便是買入黃金的好時機。但當經濟向下行，政府發行的貨幣量大增，黃金的保險及避險功能提供，相對價值上升。

經濟差買白銀 - 多用於工業，由於導熱、導電性能很好，不易受化學藥品腐蝕，質軟，富延展性，很多產品都需要用到白銀，例如手提電話。它的價值主要由經濟的繁榮、供求等關係操控著。經濟好時，工業用途增加，例如手機轉換率提高，多了人買車代步等，供求關係變得緊張，回收達不到需求，價值便上升。相反，經濟轉差，工業需求減少，供給增加，價值便減少。

但大家忘記了白銀也提供保值的能力。

在古時，中國是銀本位的國家，而歐洲有很多國家則是金銀本位制，這是什麼意思﹖ 意思便是白銀除了工業用途外，它其實也是錢的其中一種。當時中國的經濟在世界上來說數一數二，黃金的數量、產量並不足以支撐整個國家經濟活動，這便是銀本位的原因。而歐洲當時的國家經濟規模則相對較少，如果使用銀本位，白銀的供應量多，會引發貨幣貶值，而黃金的產出較少，比較適合當時的經濟規模。由於當時跟中國貿易需要使用白銀，所以便以金銀本位為貨幣。

終於收到 Scottsdale 銀條

上個月買的 Scottsdale Silver {詳情請按此} 終於都送左來!!!
等左成一個月呀…陰公豬!!! (ಥ‸ಥ)

雖然時間係長左啲，但都算值得的，俾大家欣賞下!!

1 x 10oz Scottsdale Silver Hand Poured
不過正面的獅子有少少花左，這就是缺憾美!!

9 x 100gram Cast Silver Bar by Scottsdale

隻獅子 logo 真係型爆!!

全部加起來約 1.3 kg，好鬼重!!!

試過就咁拿起 5 條 100 gram 的 silver bar 係手，覺得都已經好重手，相比起 1kg，10oz 或者500gram 都適合於收藏!! 不過係香港，暫時只有 SIC 有 500gram umicore 銀條賣。

入左條 Heraeus 1KG 銀條

日期: 2013-06-25
店鋪: 金城金條
類別: Heraeus .999 1KG 銀條
價值: HKD 5,400

見白銀價跌左幾日，又跌得咁勁，所以今日食午飯前打電話去金城金條到問有無賀利氏 (Heraeus) 1kg 銀條，接電話個靚仔把聲好有禮貌，佢話有貨，隨時上去都得，所以就係午飯時間行左去一轉。

可能係第一次去實店買白銀，所以好緊張。現場無點詳細睇條銀條，番到屋企拿出來欣賞，還不錯。只是看來有少少氧化，因為感覺上有啲黃黃地色，唔似其他金甲蟲咁影出來閃閃爍，似有層漠係到面到。搵左塊陳年抺銀布出來抺左幾下，好似都無咩用，唔知點搞好，其中一邊角有明顯黑色，好彩範圍唔太大。張單上面又唔記得叫靚仔寫番條銀條的 serial number 上去，唔知將來賣番俾佢有無影響。

不過整體感覺良好，但看來 1KG 是比較重了些，拿著它來行路覺得有些吃力  o(-`д´- ｡)

睇來都係 500 gram 似合適啲。

白銀個價而家跌左咁多，可以唔駛急住再入貨，可以慢慢來~

講開又講，原來金城、利昌同 SIC 都係係嗰頭附近，下次可以行下過去都得~

選購白銀時考慮的因素

我買白銀，基本上會考慮以下幾方面:-

純度 - 相信一般銀甲蟲都知度，銀的純度主要分 925 (92.5%，通常用於飾物)，990 (99.0%，通常用於工業)，999 (99.9%) 及 9999 (99.99%)。我通常會買 999 純度，不會買 925 或 990。

資金 - 購買白銀，我都只會用閒錢，絕對唔會去借錢。

溢價 - 買得白銀，主要係想保持購買力，當然如果有升值潛力最好，如果可以的話，我會選啲溢價比較少的銀條來買。暫時我未考慮買銀幣 (唔夠擔講一定唔會 ^_^)，例如加拿大楓葉銀幣或者鷹揚銀幣，因為溢價太高，但是可以理解的，主要係佢地的手工精緻（個價包左嫁），有發行量的限制，同埋每個銀幣包含了一定的貨幣額度，可以直接當錢用，而且，出售銀幣比銀條容易，如果你有保留個原裝袋，有好多賣銀的地方都會回收，而銀條，很多時都只能賣回給出售的店舖。

{註: 可惜我第一次就選左一種高溢價的銀條來買…因為太靚…呵呵}

認受性 - 並非我唔支持本地老店，只是因係我唔知道呢個世界會幾時先會轉用黃金、白銀來做法定貨幣，而將來我亦有可能會去香港以外的地方生活，所以，我買入的白銀最好是國際知名的 (例:  » Scottsdale、» Heraeus、umicore 或 NTR 等等)。那麼，將來我去到任何地方，我的銀條還是能夠透過不同平台出售，例如 ebay或專出售白銀的店鋪。當然，我唔排除到時候可能還是會被溶左當普通銀咁計價來被收購。但如果可以，我會盡量不賣出我手上的銀條。

重量 - 如果在考慮到 {可攜性} 及 {可售性}，我覺得 1oz 到 1 kg 是最合適的。
{可攜性} - 如果有朝一日黃金白銀變成法定貨幣，或者真係有戰爭發生，那麼，輕便的物件在走的時候一定比較方便，也易於收藏。而將來要拿條銀條出來用時，只需要拿足夠的重量作貨幣使用便可以了。如果太重 (例: 100oz、5 kg或以上的)，不便攜帶，拿出來用時會很不方便。如果是大額交易，應該考慮黃金，而不是白銀。另外，如果我是有能力一次過買到 100oz 或以上的重量，買黃金會是一個更好的選擇。
{可售性} - 假設將來白銀可以升到去 USD50/oz，甚至是 USD100/oz，那麼 100oz 的銀條，便價值 HKD77,500 (假設 USD100/oz)，到時，到達有多少店鋪或人有能力 收購你手上的白銀。

正如上面所講, 買白銀主要目的是保持購買力，要預左長期持有，三、五、七年不等，甚至永遠，而不是單純以投資角度來出發。

成為銀甲蟲 - 向 Scottsdale 買入

終於做左銀甲蟲！！

係 2013.06.07，白銀價格大跌，去到 USD21.66/toz。就係呢一日，唔係，係呢一晚，我向 Scottsdale Silver 網購左下面的 silver bar，變成銀甲蟲:-

1 x 10oz Scottsdale Silver Hand Poured
9 x 100 Gram Cast Silver Bar by Scottsdale

講真，直接向佢地網購係唔抵的，除左匯率 (用 Paypal 已經貴一節) 外，你仲要計埋個運費先得 (運來香港要俾 USD70，最多可以運到 100oz)，個溢價真係好高。當時睇番金城金條的賀利氏 1kg 銀條，其實只需要約 HKD5,8xx，而我今次全部的洗費，差唔多要成 HKD9,000。但無法，佢隻 {帶著皇冠的獅子} 令我著迷！！所以我忍唔住…最後都係買左！！

Booksilver 係佢地係香 Authorized Resller，其實 Booksliver 都有出售 Scottsdale Silver 的產品，分別有 1oz、10oz、100 oz 同 1kg，但可惜的係佢地出售的 Scottsdale Silver 靚得有啲過份，太過平滑，又反晒光，唔夠 raw，唔似白銀 (雖然真係白銀來)，所以我就真接向 Scottsdale Silver 買。但我只會買一次，除非未來白銀個價係咁跌，跌到去 USD15，咁我就會考慮再買。

今次透過 email 跟 Scottsdale Silver 溝通，感覺良好，只是因為時差問題，很多時都需要一日時間才得到回覆。Scottsdale Silver 也不錯，她們主動提到 Booksilver 是她們香港的 Authorized Reseller，讓我跟 Booksilver 溝通，能不能直接拜託 Booksilver 代購，那便可以慳會運費。只是後來跟 Booksilver 聯系後，得到的答案是她們只提供 Scottsdale 的 1oz、10oz、100 oz 同 1kg 的銀條，沒有其他…即是說不能代購啦‥

還有要考慮的其中一點是貨品的質數，因為並沒有實物查看，所以一切都要倚靠 Scottsdale 的品質控制才行。

今次購買時的使用費如下:-
當時銀價約 USD 21.67/toz
運費: USD70
購買總金額: USD1007.25
購買重量 (換算回 troy oz): 約 38.9oz (900gram + 10oz)

平均價是: USD27.69/troy oz

"巧" 貴~ 一入即蝕 USD6.0/troy oz

=_______________=

但我還是看長線的…並不是因為我買貴了便說是長線，而是我本身也把白銀看成是我財富增值的一部份，我看的是 5 年或 10 年。而不是 1、2 年。

估計要等約 2-3 星期才能收到貨，收到貨後把銀條放上來給大家觀看 ^_^

如果有銀甲蟲對 Scottsdale Silver 的產品有興趣，睇下可唔可以就到一齊買，齊齊減輕個運費!!!

黃金的迷思

近來，我一直在看有關投資黃金的資料，奇怪，黃金是一種零息投資工具，除了透過買入及賣出的差價來賺取回報，便沒有其他收入，那為什麼還是有這麼多人買黃金呢？ 我一直都想唔通，直至早幾日見到單新聞，講話有個日本婆婆把幾十年前的金賣掉去遊玩，我才明白過來。

我對黃金的著眼點在於它的價格能升多少，就好似股票咁，能為我帶來多少財富。但其實這是不正確的，黃金的主要作用是保持購買力。什麼是購買力？假設三十年前你可以使用一千円買到一安士黃金，而假設當時的一千円可以買到五百個蘋果。但今天，一千円什麼都不是，可能只可以買到十個蘋果，而今天，一安士黃金肯仍可以購買到五百個蘋果！！例子可能舉得不好，但應該容易理解。

當這樣想時，便可以理解，點解從古至今，不論是中外的有錢人，都鐘意收藏黃金。股票是一項不錯的投資，它能為你的財富增值，但卻不能保持購買力，財富增值只是 {數字遊戲} 把戲罷了，它不代表我有 {足夠} 購買力，律巴布韋便是一個好例子。

購買黃金也要看時機，個人覺得經濟向好時便應該購買黃金，因為通常這時候的黃金價格是比較低的，人們都將資金投入到股票，而人工又有得加，更不需要擔心失去工作。經濟差時便不應買，人工可能會被減掉，更可能會無左份工作，黃金因為不是法定貨幣，你不能夠拿一安士交稅、交租又或者買樓，這時你便可以賣出來黃金來保持購買力。

所以，我決定將 {黃金} 包括在我的投資組金入面。