2013.06 - 財富更新

2013.06.04:- 02318.HK 收取股息 HKD278.58
2013.06.05:- 00066.HK 收取股息 HKD299.4 (已扣 HKD30 手續費)
2013.06.08:- 向 Scottsdale Silver 購入左 1 條 10oz silver bar，及 9 條 100gram silver bar {詳細}
2013.06.11:- 04218.HK iBond，抽左兩手，派足兩手。我本人唔太願意抽 ibond，不過有人落 order 要抽，所以無計要跟。
2013.06.13:- 03988.HK，在 3.15 買入了 3,000 股。見佢股息都有 5 利幾，所以買多幾手收息。
2013.06.24:- 向金城金條購入左 1 條 1,000 gram 的 Heraeus 銀條 {詳細}

6 月底的最新財富佔比:-

00005:-    51.53%
00066:-      3.00%
00939:-    14.16%
01398:-      8.80%
02318:-      7.41%
02628:-      6.95%
03988:-      2.75%
04218:-      3.55% - ibond
silver:-        1.86%

入左條 Heraeus 1KG 銀條

日期: 2013-06-25
店鋪: 金城金條
類別: Heraeus .999 1KG 銀條
價值: HKD 5,400

見白銀價跌左幾日，又跌得咁勁，所以今日食午飯前打電話去金城金條到問有無賀利氏 (Heraeus) 1kg 銀條，接電話個靚仔把聲好有禮貌，佢話有貨，隨時上去都得，所以就係午飯時間行左去一轉。

可能係第一次去實店買白銀，所以好緊張。現場無點詳細睇條銀條，番到屋企拿出來欣賞，還不錯。只是看來有少少氧化，因為感覺上有啲黃黃地色，唔似其他金甲蟲咁影出來閃閃爍，似有層漠係到面到。搵左塊陳年抺銀布出來抺左幾下，好似都無咩用，唔知點搞好，其中一邊角有明顯黑色，好彩範圍唔太大。張單上面又唔記得叫靚仔寫番條銀條的 serial number 上去，唔知將來賣番俾佢有無影響。

不過整體感覺良好，但看來 1KG 是比較重了些，拿著它來行路覺得有些吃力  o(-`д´- ｡)

睇來都係 500 gram 似合適啲。

白銀個價而家跌左咁多，可以唔駛急住再入貨，可以慢慢來~

講開又講，原來金城、利昌同 SIC 都係係嗰頭附近，下次可以行下過去都得~

選購白銀時考慮的因素

我買白銀，基本上會考慮以下幾方面:-

純度 - 相信一般銀甲蟲都知度，銀的純度主要分 925 (92.5%，通常用於飾物)，990 (99.0%，通常用於工業)，999 (99.9%) 及 9999 (99.99%)。我通常會買 999 純度，不會買 925 或 990。

資金 - 購買白銀，我都只會用閒錢，絕對唔會去借錢。

溢價 - 買得白銀，主要係想保持購買力，當然如果有升值潛力最好，如果可以的話，我會選啲溢價比較少的銀條來買。暫時我未考慮買銀幣 (唔夠擔講一定唔會 ^_^)，例如加拿大楓葉銀幣或者鷹揚銀幣，因為溢價太高，但是可以理解的，主要係佢地的手工精緻（個價包左嫁），有發行量的限制，同埋每個銀幣包含了一定的貨幣額度，可以直接當錢用，而且，出售銀幣比銀條容易，如果你有保留個原裝袋，有好多賣銀的地方都會回收，而銀條，很多時都只能賣回給出售的店舖。

{註: 可惜我第一次就選左一種高溢價的銀條來買…因為太靚…呵呵}

認受性 - 並非我唔支持本地老店，只是因係我唔知道呢個世界會幾時先會轉用黃金、白銀來做法定貨幣，而將來我亦有可能會去香港以外的地方生活，所以，我買入的白銀最好是國際知名的 (例:  » Scottsdale、» Heraeus、umicore 或 NTR 等等)。那麼，將來我去到任何地方，我的銀條還是能夠透過不同平台出售，例如 ebay或專出售白銀的店鋪。當然，我唔排除到時候可能還是會被溶左當普通銀咁計價來被收購。但如果可以，我會盡量不賣出我手上的銀條。

重量 - 如果在考慮到 {可攜性} 及 {可售性}，我覺得 1oz 到 1 kg 是最合適的。
{可攜性} - 如果有朝一日黃金白銀變成法定貨幣，或者真係有戰爭發生，那麼，輕便的物件在走的時候一定比較方便，也易於收藏。而將來要拿條銀條出來用時，只需要拿足夠的重量作貨幣使用便可以了。如果太重 (例: 100oz、5 kg或以上的)，不便攜帶，拿出來用時會很不方便。如果是大額交易，應該考慮黃金，而不是白銀。另外，如果我是有能力一次過買到 100oz 或以上的重量，買黃金會是一個更好的選擇。
{可售性} - 假設將來白銀可以升到去 USD50/oz，甚至是 USD100/oz，那麼 100oz 的銀條，便價值 HKD77,500 (假設 USD100/oz)，到時，到達有多少店鋪或人有能力 收購你手上的白銀。

正如上面所講, 買白銀主要目的是保持購買力，要預左長期持有，三、五、七年不等，甚至永遠，而不是單純以投資角度來出發。

Scottsdale Silver & Gold LLC

網址: http://www.scottsdalesilver.com
溢價: 以美金元計，唔計運費的話約 9% - 10%
回收: 當然有…不過你要自己運番過去先得…
純度: 999 (銀)
特色: 每件銀條都印有一隻帶著皇冠的獅子的 logo

我有試過呢間嘢，詳情請看 {成為銀甲蟲}。講真，佢做的銀條真係好靚，尤其是印左隻帶著皇冠的獅王係上面，直頭係藝術一樣!!! 我最 like 的係佢的 cast bar 及 hand poured bar，raw 得來又有氣勢，無得頂!!!

不過如果直接向 Scottsdale Silver 購買，你要預左個溢價好高，差唔多要 25%，因為運來香港的費用要 USD70，以投資角度來講一定唔係好選擇。所以我都只係買過一次。佢地話 USD70 可以每次最多運到約 100oz 的銀。 所以，買得愈多愈好，將個運費平均加番去每 oz 入面，減低溢價。

Scottsdale Silver 提供好多選擇，銀條 (5gram、1oz、10oz 或 100oz)、銀章 (1oz、1/4 oz) 或是 cast bar (100 gram、1,000 gram) 或 hand poured bar (5oz、10oz)，咩都有。而 Booksilver - 柏克希爾貴金屬是她們香港的 都有售賣其中的 1oz、10oz 、1 kg 及 100oz 的銀條。

佢地的服務幾好，以我上次的經驗為例，我只是買 USD1,000 的銀，但過程入面，因為係第一次買，好多都唔識，所以 send 左好多 email 俾佢地問長問短，又要求佢地送來的貨要無暇，又要有收據，但佢地好好，好快覆我 email，因為時差問題，大約一天到便有回覆。只是送貨的時間比較長，等左好耐。

不過要留意，Scottsdale Silver 並不是 LMBA-listed 公司。意思即是她們的銀條在倫敦金銀市場 (London Bullion market) 不能用來交收。不過正如其他的品牌 (例如: NTR、Sunshine Mint、US Mint 等)，Scottsdale Silver 品牌已是世界公認！！

成為銀甲蟲 - 向 Scottsdale 買入

終於做左銀甲蟲！！

係 2013.06.07，白銀價格大跌，去到 USD21.66/toz。就係呢一日，唔係，係呢一晚，我向 Scottsdale Silver 網購左下面的 silver bar，變成銀甲蟲:-

1 x 10oz Scottsdale Silver Hand Poured
9 x 100 Gram Cast Silver Bar by Scottsdale

講真，直接向佢地網購係唔抵的，除左匯率 (用 Paypal 已經貴一節) 外，你仲要計埋個運費先得 (運來香港要俾 USD70，最多可以運到 100oz)，個溢價真係好高。當時睇番金城金條的賀利氏 1kg 銀條，其實只需要約 HKD5,8xx，而我今次全部的洗費，差唔多要成 HKD9,000。但無法，佢隻 {帶著皇冠的獅子} 令我著迷！！所以我忍唔住…最後都係買左！！

Booksilver 係佢地係香 Authorized Resller，其實 Booksliver 都有出售 Scottsdale Silver 的產品，分別有 1oz、10oz、100 oz 同 1kg，但可惜的係佢地出售的 Scottsdale Silver 靚得有啲過份，太過平滑，又反晒光，唔夠 raw，唔似白銀 (雖然真係白銀來)，所以我就真接向 Scottsdale Silver 買。但我只會買一次，除非未來白銀個價係咁跌，跌到去 USD15，咁我就會考慮再買。

今次透過 email 跟 Scottsdale Silver 溝通，感覺良好，只是因為時差問題，很多時都需要一日時間才得到回覆。Scottsdale Silver 也不錯，她們主動提到 Booksilver 是她們香港的 Authorized Reseller，讓我跟 Booksilver 溝通，能不能直接拜託 Booksilver 代購，那便可以慳會運費。只是後來跟 Booksilver 聯系後，得到的答案是她們只提供 Scottsdale 的 1oz、10oz、100 oz 同 1kg 的銀條，沒有其他…即是說不能代購啦‥

還有要考慮的其中一點是貨品的質數，因為並沒有實物查看，所以一切都要倚靠 Scottsdale 的品質控制才行。

今次購買時的使用費如下:-
當時銀價約 USD 21.67/toz
運費: USD70
購買總金額: USD1007.25
購買重量 (換算回 troy oz): 約 38.9oz (900gram + 10oz)

平均價是: USD27.69/troy oz

"巧" 貴~ 一入即蝕 USD6.0/troy oz

=_______________=

但我還是看長線的…並不是因為我買貴了便說是長線，而是我本身也把白銀看成是我財富增值的一部份，我看的是 5 年或 10 年。而不是 1、2 年。

估計要等約 2-3 星期才能收到貨，收到貨後把銀條放上來給大家觀看 ^_^

如果有銀甲蟲對 Scottsdale Silver 的產品有興趣，睇下可唔可以就到一齊買，齊齊減輕個運費!!!

輕輕鬆鬆儲積分換機票

我好鐘意去旅行，如果可以的話，我一年點都要去旅遊一次。唔駛遠，去亞洲就得，好似台灣、日本、韓國或泰國等地方就得。

去呢幾個地方的機票其實唔會太貴，計埋稅可能都係五千港紙上下 (假設去北海道)。但為左本著有得慳便慳的宗旨，我而家主要都係靠儲信用卡積分來換 Asia Miles，再換機票。你可能覺得用信用卡來換機票唔抵，因為信用卡的積分都係來自於支出，你唔去消費，你係唔會有積分的，同時，換 miles 時亦會有手續費，而且好難每年都可以儲夠積分換 miles (雖然我真係有朋友做到 @_@)。

是的，我認同要有積分，便要先有消費。在我們日常生活中，有一些支出是不能避免的，例如在跟家人、朋友或同事聚會時使用信用卡，幫下朋友買嘢等，只要能夠用得其所，我們還是可以儲到可觀的積分。而一般信用卡積分都有 5 年有效期，而 miles 亦都有 3 年有效期，所以，如果每 3 年便有一張免費機票已經算唔錯。

同時，好多信用卡的迎新優惠都好吸引，例如永隆，而家申請 (2013.06.06)，簽滿 HKD 2,800 便先送你 60,000 積分，可以換到 5,000 miles，除左咁，佢仲係你遞表格時即時送你 HKD 100 百佳現金卷及 HKD 10 大家樂現金卷。 有啲仲簡單，只要完成網上申請，便即時送你 miles。例如 DBS AE 黑卡 都係，呢張嘢基本上無年薪要求，年薪得 100,000 佢都一樣會批俾你，早排有一個活動，只要經網上成功申請便會即時先送你 1,500 miles。

夠一年，你可以將積分換成 miles，跟著除消張卡，到佢下一次 (通常要求你 12 個月內不是該銀行的信用卡客戶) 再有優惠，你便可以再申請。

去台灣要 15,000 miles，去日本都只要 30,000 miles，基本上唔難。

咁多間，儲積分換 miles 最扺的係用 DBS AE 黑卡，6 分就換到 1 miles。但唔係每個地方都可以用 AE，所以，我會同時推展你用東亞白金卡，8 分便可以換到 1 miles。

複利的威力

兩家內銀同時為股東帶來好消息。中行（03988）行長李禮輝表示會考慮小股東建議，推出以股代息計劃；

資料來源: http://orientaldaily.on.cc/cnt/finance/20130530/00202_028.html

==

如果係的話就好，{複利} 之所以咁勁係因為你可以將收到的利息再投資。

簡單舉個例子，你有 100 萬可以用來投資，假設每年有 20% 利息，那麼:-

本金: 100萬
第一年: 120 萬 (= 100萬 x 1.2)
第二年: 144 萬 (= 120萬 x 1.2)
第三年: 172.8 萬 (= 144萬 x 1.2)

係股票市場上，除非你投資的本金好大，所收到的股息都會很大，可以用來再投資，否則，以股代息係一個實現 {複利} 的好選擇。以中國銀行 （03988.HK) 為例，2012 年每股派息是人民幣 0.175，折合約港幣 0.2181，再扣番 10% 股息稅，真正入袋的只有約港幣 0.1964。如果手持 10,000 股的話，就會收到港幣 1,964 (沒扣入手續費)。以現價 (2013.05.31) 每股港幣 3.67 計，收到的股息連 1 手中國銀行也買唔到，完全做唔到 {複利} 的作用。

所以，如果中國銀行以後真係有以股代息，好似匯豐 (00005.HK)，咁就唔同啦。收到的股息雖然少，但卻可以用股票來替代，股票數量每年都會增加，再以中國銀行為例子:-

假設手持 10,000 股，每年的股息都是每股 0.1964 (扣稅後)
第一年股息為 1,964，假設換股價係 3.67，可以換到約 535 股，那我便會有 10,535
第二年股息為 2,069，假設換股價係 3.67，可以換到約 563 股，那我便會有 11,098
第三年股息為 2,179，假設換股價係 3.67，可以換到約 593 股，那我便會有 11,691

財富每年都自動增加，我真的希望除了中國銀行外，工商銀行、建設銀行及中國平安等都可以考慮以股代息

 :-)

唯一要考慮的，就係要選一間可以供你自由出售碎股的網上投資平台，打電話並不切合現代人的要求。